СлабовидящимСлабовидящим

Кулэ кужыммес огазеяны

Россиысь фин-угор калыкъёслэн ассоциацизы (АФУН) Сыктывкарын аслэсьтыз VI-тӥ съездзэ радъяз. Куинь нунал купсын пӧртэм ӧръёсын герӟаськем юанъёс ӝутиськизы: этнотуризм, дышетскон, наука но мукет.

Мыным, «Шунды» огазеяськонлэн ёзчиезлы, тунсыко вал егитъёсын ужанлы сӥзем секциын кенешыны. Котькуд калыклэн та ӧръя ужез пӧртэм сямен радъямын: кин ке политикае бадӟым вамышъёсын выже, кин ке культура удыслы ассэ сӥзе, кин ке али гинэ бурдъяське. Вань делегатъёсты кылзӥськыса, валаськод, удмурт калык интыяз уг сылы шуыса: арысь аре пӧртэм проектъёс улонэ пыӵатэ. «Шунды» огазеяськон сярысь ивортэме бере тросэз паймыса вазиськылӥзы. Ӧнерчиос, дизайн, уксё поттон ласянь юалляськизы.

Озьы ке но, асьмелы вань малы дышетскыны мукетъёсызлэсь. Кылсярысь, коми егитъёслэн «Ми» союззы ӵем радъя коми кыллы сӥзем акциос. Соос картӥ, магазинъёстӥ ветло, коми кылын вераськыса, калыклэсь реакцизэс эскерыса. Озьы ик фин-угор проектъёс радъяло. Арлы быдэ егитъёслы «FUROR» форум доразы ортчыто. Асьмелэн туж шер ужало сыӵе площадкаос, кытын фин-угор егитъёс быгато ог-огенызы кусып кылдытыны. Валаськод, кулэ кужыммес огазеяны шуыса, угось таяз удысын ми золгес, мукетаз – соос. Ваче ки ужам к, рос-прос пректъёс вордӥськозы.

Съездлэн огъя программаез вал туж узыр но пайдаё. Шӧдӥське вал ваньзылэн каньыл мылкыдзы, ваньзы усьтӥськемын выль тодматсконъёслы, малпанъёслы. Мон та выллем ужрадэ нырысьсэ пыриськи, оло, соин ваньмыз шоры выль синмын учкыны ӧдъяй. Йырам малпанъёсы бугырскизы, оскисько, таӵе мылкыд юрттоз огазеяськонмылы выль ужъёс борды кутскыны.

afun