Логотип института удмуртской филологии, финно-угроведения и журналистикиИнститут удмуртской филологии,
финно-угроведения и журналистики

Слабовидящим

Александр Эрик

(1909 – 1952)

Александр Эрик

Александр Эрик (Александр Никифорович Наговицын) вордскиз Глаз ёросысь Туктым (Омутница) гуртын. Крестьян семьяын куинь пиос но одиг ныл будизы. Федосья берло артистка луэ. 1921-ти арозь одиг коркан 16 кузя улиллям. Кык валзы вылэм, кык скалзы, 5-6 ыжъёссы. Кос аре пудо-животтэк кылиллям, но семьязы яна потэм. 1925-ти арозь шуг улиллям, агай-вынъёс батракаса ветлиллям.

Александр 16 аресысен сельсоветын секретарь луыса ужаз. 1927–1928-ти аръёсы Ижын интыысь советъёслы ужасьёс дасясь школаын дышетскиз. 1928-1929-ти аръёсы егит мурт мыло-кыдо тыршиз Глазовын потись «Выль гурт» газетын. Фельетонъёсыз улэ со Чипчирган нимын гожтиськылиз. Татын ужакуз ик егит автор гожтэт пыр Кузебай Гердэн кусып возе. Куд-ог кылбуръёссэ со Очко Санко нимын поттылиз, нош тужгес но бордаз бурмиз Эрик псведонимез. 1929–1931-ти аръёсы А. Эрик Ижкарын «Удмурт коммуна» газетын ужа. Писательёслэн конференциязы, 1930-ти арын, со «куатё муртлэн платформаезлы» дурбасьтэ. Но, кызьы гожтэ А.Г. Шкляев, «1930-ти арын ик со, Герд борды бурмем кылбурчи, аслаз дышетисеныз тэкшеронэ пыриське но ассэ соин ваче пумит пуктэ». 1930-ти арын одиг туспуктэме пуксё Кузебай Герд, Айво Иви, Александр Эрик но пор писатель Сергей Чавайн. Со но муг, пе, луиз А. Эрикез берло янгыше уськытыны.

1931–1933-ти аръёсы Эрик Одессаын военной службаын вал. 1933–1936-ти аръёсы выльысь «Удмурт коммунаын» тырше, нош 1936–1937-ти аръёсы – Глазкарысь «Стахановец-строитель» газетын. 1937–1941-ти аръёсы А. Эрик Одессаысь киностудиын ужа. 1940-ти арын со Ленинградысь журналистикая институтлэсь заочной отделенизэ йылпумъяз.

1941-ти арын ожгарлэн кыкети нуналаз Эрикез фронтэ басьто: рядовой луыса ужа 150-ти дивизилэн штабаз. 1941-ти арын 6-ти шуркынмонэ Ростов улосысь Новошахтинск кар возын со пленэ сюриз. Война дугдытозь возё концлагерьёсын. 1945-ти арын, 5 пленнойёсын чош, А. Эрик Оффенбург лагерьысь пегзыны быгатиз. Нырысь Францие сюризы, собере соосты советской командование кие сётизы. 1945–1946-ти аръёсы ужа Донбассысь Елеон рудоправлениын; 1946–1947-ти аръёсы – Глазкарысь механической заводын; 1947–1949-ти аръёсы – Глазкарысь «Ленин сюрес» газетын.

Берло аръёссэ А. Эрик «Советской Удмуртия» газетын ужаз. Пытсамын вал 1951-ти арын Балезино посёлокысен. Обыск дыръя шедьтэм кигожтэтъёссэ сутизы, соос полын: «На чужбине» повесть (232 бам), «Кужым» роман (321 бам), «Лыкты одно ик» верос но мукетъёсыз. Кылбурчилэн вынызлы сётиллям «Улон куашка» пьесазэ. 1952-ти арын юнме шорысь ыбемын. 1989-ти арын, А.Г. Шкляевлэн но П.К. Поздеевлэн сюлмаськеменызы, янгыштэмен лыдъямын.

А. Эриклэн нырысети кылбуръёсыз гожтэмын 1928-ти арын. Берлогес соос нимаз книгаосын потизы: «Кылбурстрой» (1931) но «Чукна» (1935). Писательлэн «Кужым кыда» романэзлэн люкетъёсыз печатласькизы «Пролетар кылбурет удысын» («Кылбурет удысын») (1931, 1933) журналын. Со сяна, 1940-ти арын потэ «Будон» нимо нылпиослы веросъёсын книгаез. А. Эрик – «Ми», «Туктым», «Ушъяськон» поэмаослэн но авторзы («Ми» сянаез ышемын). Коня ке произведениосты зуч кылысь удмуртэ берыктэ. Озьы ик «Зарни меда крезьгуръёсы» кырзанлэн авторез луэ.

«Кылбурстрой» (1931): Та бичетэ пыризы А. Эриклэн 1930-ти аре гожтэм кылбуръёсыз. Кылбурчи татын социализмлэн вормонъёсыз понна партилы тау каре. Трос учыре со «чылкыт лирикалы» матын луисьёсын ченгеше: кылбуръёсаз «сяська» вужезлэн тодметэз луэ, нош «андан», «завод», «колхоз», «станок», «машина» – вылезлэн. Вужез понна дурбасьтисьёслы А. Эрик вань йыркурзэ кисьтэ, тушмонъёссэ «нымы», «льомтэй», «керныж», «низьли» образъёс пыр возьматэ. «Корт», «андан», «тыл» кылсуредъёс кылбуретаз озьы ик валтись инты басьто. Автор чемысь «кылбурет но кылбурчи» темалы вазиське, тужгес но трос та выллем текстъёсыз сборниклэн «Кылбур – заводлэн ог цехез» нимо люкетаз пыремын.

«Чукна» (1935): Таиз сборникез Удмурт Автономилэн кылдэмез дырысен 15 ар тырмонлы сиземын вал. Автор кыкети бичетаз озьы ик «кылбурет но кылбурчи» темаез азинтэ. Поэзиез со пычалэн артэ пуктэ. Та аспортэмлыко чошатон пыр вакытлэн шомыз шараяське, куке вордиськем шаерез тушмонлэсь утён тема литератураын тужгес лэчыт луэ. «Пычал» выллем образъёс яратонлы сизем чуръёсын но пумиськыны кутско: «Тон мынам, мусо Ание, / Пычалэ кадь – чылкыт, матын»; «Пычалме, тонэ, Ание, – / Одиг кадь зырдыт яратско».

Зэмос лирика мылкыдо луо А. Эриклэн яратон темалы сизем куд-ог кылбуръёсыз: «Кырзало тыныд», «Зарезьлэсь крезьзэ кылзон дыръя…», «Чупчи пасьтана» но мукетъёсыз. Удмурт критик А. Бутолин пыкылэ авторез импрессионизм оре «гылземез» понна. Критикъёс выли дунъязы А. Эриклэсь кылбур форма кылдытон ласянь зэмос усточи луэмзэ, но огдыре ик, кылбуръёсызлэсь пуштроссэс курласа, сое «формалист» шуэмзы потиз.

Эриклэсь кылбуръёссэ ас вакытысьтыз дунъясьёс таче резь-резь образъёсыз пыр висъязы: «тыпылес», «тулег», «сальккес», «гудырес», «пальккес», «тяпылес». Неологизмъёс полы пыртыны луоз: «ужбур чильпет», «кужымпуд», «кужымчи», «кылкужым», «кылбуржу», «кылбурпарсь», «визькужым», «кылпу», «веськресто», «пезьгытске» кылсуредъёссэ. Тунсыкоесь метафораосыз: «Мынам паласькиз улон ком», «понэмын кус пулсы кык ар», «эшъяськи тодонлык коосын», «скалаос нош пукто пумитаз из кымес», «ву тулкым ко», «улон шепез пинямы куртчиськом». Кылбурчилэсь чуръёсты рифмаян ласянь усточи луэмзэ возьмато та выллем рифмаос: «кышкатэк – вамыштэт», «дуринчи – кылбуртчин», «уртче – куртчет», «чильтро – китрос», «пычалме – пачылме», «весяк – кесяд», «из борды – эн пырды», «сьод чипей – пось чупен», «веськресто – сэсто».

(С. Арекеева)