Логотип института удмуртской филологии, финно-угроведения и журналистикиИнститут удмуртской филологии,
финно-угроведения и журналистики

Слабовидящим

Михаил Федотов

(1958–1995)

Михаил Федотов

Михаил Иванович Федотов, нырысети бесермян кылбурчи, вордскиз 7-ти коньывуонэ 1958-ти арын Яр ёросысь Ворча гуртын бадзым бесермян семьяын: «Тани вуоз чукна, / Пуксём ми жок сьоры: / Ми куать кузя: / Братъёс но сузэрмы, / Анай войын жуксэ / Жутоз быдэс дуры...», – гожтэ со «Берекет» поэмаяз. Пичи дырысьтыз тодэ-ваёнъёс Михаил Федотовлэн лирикаяз мур пычамын. М. Федотов пичи дыръяз ик суреданы дышетскиз.

Зэмос анай-атай бордын будон – со туж силы, номырин чошатонтэм шуд. Котьку но шуныт кылъёсын вера вал Михаил анаез-атаез сярысь, трос кылбуръёссэ сизиз гажано адямиосызлы, оглом бесерман калыклы («Мушник», «Э-э, зеге тон, чуж зеге..», «Колодча дурын», «Атаелы», «Бадяр», «Кырзалом, анай»).

     Анае но дасялоз вал
     Бессермян дисьсэ,
     Кашпузэ но со кертоз вал
     Кутчалоз кутсэ.

Миша Федотов школае мыниз 1965-ти аре, Ворча гуртын дышетскиз. Малпаське вал Миасской горной техникуме пырыны, ас палысьтыз муизъёсты люка-эскере вылэм. Но анаез сое лэзьымтэ, палэнын варгаз зазег кадь луод, пе.

Школаын дышетскон аръёсаз гожъяськыны кутске. Флор Васильев солы «Гужем дыр» книгазэ кузьма, собере пияшлэн кылбур гожъян мылкыдыз оз бырылы ни. Ас дораз, бадзым семьяязы нокин медаз люкеты шуыса, гур вылэ ватскыса гожъяське вылэм.

1976-ти арын Удмурт университетэ пыре. Нырысети курсын бесермян кылын вераське ай. Берло гинэ эшъёсыз сое удмурт кылын вераськыны дышетизы. Вераськыны могзе вал бере (пичи дырысеныз висён), экзаменъёссэ гожъяса сётылиз.

«Тодьы юсьёс берто» кылбур бичетэз дась вал ини, университетын дышетскыкуз ик (ас киын «поттэм» вариантсэ но лэсьтылиз – «Тодьы юсьёс берытско»), но книгаез трослы бергес печатласькиз. 1977-ти арысен 1981-ти арозь «Советской Удмуртия», «Дась лу!», «Сельская правда» газетъёсын потало вал заметкаосыз, кылбуръёсыз, басняосыз.

1980-ти аре гужем атайзэ ватэ, кудиз Быдзым Атыкай ожгарез ортчиз: «Сьод куакаоc тодэ вайытизы / Сьод гу доры котыр султэм вужеръёсыз. / Со вужеръёс / Выльысь улзытизы / Атай понна бордэм куараосыз». Егит поэт нырысети курсын дышетскыкуз ик синмаське чош дышетскись нылашлы, Шаркан палась Аня Ефимовалы.

Университет бере Мишаез одиг арлы армие басьто. Казаньын лэсьто йыраз операция, нош отын висьыны кутскеменыз валче комиссовать каро, службазэ пумаз ожытлы гинэ оз вутты, Ворча гуртэ берытскиз 6-ти декабре 1982-ти аре. 1983-ти аре январе сюанзы ортчиз.

Армия бере М. Федотов ужаз «Советской Удмуртия» газетын корреспондент луыса. УдНИИ-ын тодосчи луыса тыршыны малпа вал, ас бесермян калыкез сярысь тодослыко ужъёс, кыллюкамъёс лэсьтыны кутскиз ни вал (диплом уженыз). Но УдНИИ-ын солы верало, ужан интыос овол шуыса. «Молот» журналын М.Федотов кивалтиз поэзия но критика отделэн. 1983-ти арысен кутскыса выже «Удмуртия» книгапоттоннилэн чеберлыко но нылпи литературая ёзэтаз, солэн кивалтисез луэ, ужа редактор чотын. Котькуд авторлы тыршылиз кулэ луись дэмланъёс сетыны, авторез кулэ ораз валтыны. Издательствоын ужакуз ик поттиз «Тодьы юсьёс берто», «Берекет», «Вось» книгаоссэ.

«Тодьы юсьёс берто» книгаез печатласькиз 1986-ти аре. Рецензентэз – тодмо кылбурчи Владимир Романов, кудзэ Миша аслад дышетисеныз лыдъя вал. Чош дышетскем эшез, критик Александр Лаптев, тазьы вера кылбур бичет сярысь: солэн инъетэз аспортэмлыко, пе, автор улонысь зечсэ но уродзэ, адямиослэсь кусыпъёссэс, вакытмылэсь бугрессэ ортчем дырын полэстыса-пуныса, дыртытэк, огсыр малпаське. Бичетысь шодыны луоз Флор Васильевлэн кылбуретысьтыз куараосты но. Но гожтосъёсын тырмыт уггес шодиськы на, пе, гражданской но публицистической зырдытэз. Книгаез лыдзыса валаськод, шуэ А. Лаптев, кылбурчи юн яратэ вордскем палъёссэ, Яр ёросэз.

1991-ти арын Москваын сое СССР-ыcь писательёслэн огазеяськоназы куто. Нош феврале 1988-ти арын М. Федотов Удмуртиысь комсомоллэн Флор Васильев нимо литературной премиезлэн нырысети лауреатэз луэ – «Берекет» нимо книгаез понна (1988). Пусъемын вал, солэн вордскем интыосыз озьы ик бадзым инты басьто шуыса, возьматэмын шаермылэн чеберез, тужгес ик бесермян йылолъёсыз умой возьматэмын шуыса. Ваньмыз со поэзизэ национальной шомо каре. Талэсь азьлогес солы «Лучший по профессии» си-дан грамота сётэмын вал. Озьыен, солы улон инты басьтыны луонлык «усьтиське» (татчыозь семьяеныз со ёркыт пу коркалэн пичи висъетаз улиз). 17 мае 1989-ти аре сое келяло Москвае писательёслэн Всесоюзной кенешоназы. Отын егит кылбурчилы дэмлало ас кылбуръёссэ зуч кылэ берыктыны. 12 июне 1989-ти арын ветлэ Йошкар-Олае, нырысети финно-угорской калыкъёслэн пумиськоназ делегат луыса. 12 сентябре 1990-ти арын пусъемын вал «Отличник печати» знакен.

Бадзым инты басьтиз М. Федотовлэн улоназ Владимир Романовэн эшъяькон. Нырысьсэ соос пумиськизы 1974-ти арын Яр палъёсын. В. Романов кулэм бере ик М. Федотовлэн улоназ кутске кризис. 1991-ти арын потэмын «Вось» нимо книгаез, кытын автор улон но кулон темаез паськыт шарая. 1985-ти арын М. Федотов Ува ёросысь басьтэ аналтэм cэрегысь дунтэм пу корка. Со коркалэн кылсуредэз трос пумиське берпумети сборниказ.

     Шедьти, лэся, аслым берпум сэрег…
     …Та сэрегам гинэ шуныт но чус,
     Монэ гинэ кылзо буш борддоръёс.

Кылбурчи калыклэн малпанъёсаз пырыны тырше. Соин ик, лэся, чуръёсын чем пумисько Инмар, воршуд кылъёс, нош кокы, инвис, вир, вот, вужер, кайгу кылъёс, соос символ пуштросо луо.

«Удмуртия» книгапоттонниысь кошкыса, М. Федотов выже «Кенеш» журналэ. 1995-ти арын потэ солэн «Юг сюлэмын жуа шыртыл» нимо кылбур сузьетэз. Ньыль толэзь гинэ ужаса вуттиз М. Федотов «Кенеш» журналын. 6-ти куартолэзе 1995-ти арын Ижкарысь одигаз эмъяськонниысен малпамтэ шорысь солэн сюлэмыз ужамысь дугдиз.

Паймоно кадь, кыче кужмо вылэм кылбурчилэн азьпалаез сярысь шодонлыкез. «Уйбыртон» кылбураз со ваньзэ-ваньзэ тодэ кадь, кызьы сое ватозы («нош ваизы монэ сяськаосын»), кыче адямиос со котырын бергалозы («кин ке бордиз курыт синкылиен», «нош кин ке мышкам ветлэ вал кольыен»). Собере со гожтэ: «Пеймыт гуын потиз мыным люкыт. / Монэ соку зор ву, лэся, эмъяз. / Жутски гуысь. / Пукси изэ вылэ. / Кытчы мыном, кытысь шедьтом чуслык? / Дунне вылысь кинлы на мон кулэ? / Шат кырныжлы, юстэм лек кырныжлы?»

(Елена Агафонова)