Логотип института удмуртской филологии, финно-угроведения и журналистикиИнститут удмуртской филологии,
финно-угроведения и журналистики

Слабовидящим

Михаил Покчи-Петров

(1930–1959)

Михаил Покчи-Петров

Солэн яркыт гожъяськон кизилиез жуатскиз ХХ даурлэн шораз. Вордскиз Михаил Петрович 4-ти октябре 1930-ти арын Можга ёросысь Нышы-Какси гуртын. Нышы-Какси – удмурт гурт, соин ик кылбурчилы пичиысен пычатэмын, лэся, калыкез гажан, адямилыко луон, котыр улосэз утялтон но утён мылкыдъёс. Солэн музъем вылаз будизы трос дано, тодмо адямиос. Соос полын вал Игнатий Гаврилов, Василий Гаврилов, тодмо артист но литературачи, драматургия удысын тодмо луись Анатолий Григорьев, кылбурчи Анатолий Петров. Али дыре но Нышы-Какси музъем будэтэ аслэсьтыз визьмо пушъетъёссэ.

Шор ёзо школазэ быдтыса, Михаил Покчи-Петров, вань егитъёс сямен ик, малпаськыны кутске азьлань улонэз сярысь, быръем ужез сярысь. Атаезлэн потэ вылэм, пиез кивалтись мед луоз шуыса. Берло Михаил Петрович та сярысь кылбур но гожтоз. Нимаське со «Атаен вераськон». Нош пиез мукет сюрес бырйиз.

Трос тодмо писательёс сямен ик, пыриз дышетскыны Можга педучилищее. Татын ужа вал литературно-творческой кружок. Тросэз гожъяськисьёс шедьтизы быгатонлыксэс Можга педучилищеысь литературно-творческой кружоклы луыса. Озьы ик татын ужаз на драматической кружок, кудзэ вань сюлмысь басьтиськыса, туж быгатыса, тунсыко нуылиз Екатерина Алексеевна Коновалова. Та паймымон дышетись аслэсьтыз кужымзэ, быгатонлыксэ трос тодмо адямиослы сётиз.

Дышетскыны гуртысь кошкыса, студент луыса, адями нош но нош йыраз бергатыны кутске аслэсьтыз улонзэ. Озьы ик со мозме анай-атайлэсь, гуртлэсь, эшъёслэсь. Соку ик, дыр, вордскыны кутско туж зеч кылбуръёс – сюлэмлэн кырзанъёсыз.

Гожъяськыны кутске Михаил Покчи-Петров Можга педучилищеын дышетскыкуз, ньыльдонэти аръёслэн пумазы. 1949-ти арысен кылбуръёссэ элькун газетъёсын но журналъёсын поттыны кутско.

Можга педучилище бере Михаил Покчи-Петров тубе улонлэн эшшо одигез тубат вылэ – Удмурт пединститутлэн филологи факультетаз дышетскыны пыре. Одиг арзэ дышетскыса, кошке Москвае. Москваысь Луначарский нимо театральной институтлэн режиссёрской факультетаз дышетске. Вить ар – 1951–1956 – тужгес но яркытэз Михаил Петровичлэн улоназ. Егит дыръяз Михаил Покчи-Петров туж яратиз Москваез, солэн отын портэм кунъёсысь трос эшъёсыз вал.

Кылбурчи, мае адзе, ма гинэ бугыртэ солэсь сюлэмзэ, ваньмыз сярысь гожъя. М. П. Покчи-Петровлэн 1956-ти аре нырысети кылбур сборникез потэ –«Тодматскон». Автор тодматэ ассэ лыдзисьёсын, ачиз соосын тодматске, малпаське та сборниказ ас калыкез сярысь, эшъяськон, анай-атай, пинал дыр сярысь, йыраз кылдо улонлы сизем философской кылбуръёс. Егит пи табере зэмос воргорон синмын учке улон шоры. Капчи ой вал со улон, ноку но, дыр, уз но лу. Трос пол кылбурчи тодаз вайылэ агаезлэсь ожын быремзэ. Ненег малпанъёсын, чебер кылъёсын вордисько чуръёс мусо анаез сярысь. Со гожтэ та сборнике пырем «Анай» кылбураз:

     «…Тулыс куазь кадь бадзым но сайкыт
     Тон сярысь малпанэ, веранэ.
     Ошмес ву кадь ик котьку чылкыт
     Тонэ вань улытозям гажанэ…»

Михаил Петровичлэн кылбуръёсаз шедьтомы кивалтэт сярысь но кылбуръёсты. Но мечак та кылъёс верамын овол – соос ватэмын. «…Кынмемын тон али, музъеме, / Мугордэ мур лымы шобыртэм. / Тон кезьыт. Нош кызьы-о сюлме / Та дыръя но лыктэ шунытэд?...». Кылбурчи данъян кылъёсын гожъяз Ленин, Сталин сярысь.

Кылбурчилэн кыкети бичетэз нимаське «Малпаськон». Со потэ 1959-ти арын, «Тодматскон» бере куинь ар ортчыса. Зэм но, улон зол малпаськытэ Михаил Покчи-Петровез. Татчы пыро ин яратон сярысь кылбуръёсыз, улонын ог-огедлы юрттон тема озьы ик малпаськытэ авторез, котыр инкуазьлэн паймымон куараоссэ солэн кылбуръёсысьтыз шодиськом. Тани, кылсярысь, «То:л» кылбураз со возьматэ чылкак улэп кадь, пель сьорын шодиськись толлэсь шокамзэ.

     «…Каллен шонаськись льомпулэн ваеныз
     Чабъяз штораен шобыртэм укноез,
     Кылись нош уз лу – вотало ни ваньмыз,
     Оз усьтэ колись кузеос осъёссэс…
     …Нош тол лекомиз, вожомиз кадь соку!
     Зор ву шапыкез лек пазьгиз укное.
     Секыт мылкыдын азбарысь потыкуз,
     Зукыр вазьытиз зирыё зезьыез.
     …Бордиз отын жож тэльмырись куараен,
     Юбо езъёсты крезь силы пормытъяз.
     Кошкон азяз со муръёе лэзиськиз,
     Вузиз отын, ас улонзэ каргаса…»

Та сборниказ ик пыро вакчи поэмаосыз «Сизьыл» но «Эшен люкиськон». Кулэм бераз ини авторлэсь поттизы зуч кылын «Под небом твоим » зуч кылбуръёсын потэм сборниксэ.

Быгатись адями пормытэ ужаны вань удысъёсын. Михаил Покчи-Петровлэн трос ик кылбур сборникез потэмын овол. Озьы ке но, ваньмыз соос, сюлэмысь потыса, калык полы юн пычамын, кырзанлы пормемын. Кырзан – со сюлэмлэн куараез. Озьыен, Михаил Покчи-Петров котькуд удмурт адямилэн сюлэмаз улэ.

Кылбурет удысын сяна, Михаил Покчи-Петров вакчи улонэз куспын тодмо драматург но луыны вуиз. Удмурт драмтеатрын солы кема ик ужаны оз кылды. Куинь сезон куспын режиссёр быгатыса пуктиз трос спектакльёс удмурт, зуч но кунгожсьор драматургьёслэн пьесаоссыя но романъёссыя. Кылсярысь, Степан Широбоковлэн «Чукдор», Игнатий Гавриловлэн «Шунды жужаз» пьесаоссыя, Михаил Петровлэн «Вуж Мултан», Трофим Архиполэнв «Лудзи шур дурын» романъёссыя, Островскийлэн «Пучина», Арбузовлэн «Шестеро любимых», «Таня» но Володарскийлэн «Фабричная девочка» пьесаосызъя.

Вакчи дыр куспын – солэн улонэз кузь ик ой вал – 1959-ти арын егит кылбурчи бырыны шеде. Михаил Покчи-Петров тубыны быгатиз улонлэн туж выли тубатъёсаз.

Солы сётэмын вал «Заслуженный деятель искусств УАССР» дано ним. 1958-ти арын луиз СССР-ысь писательёслэн огазеяськонзылэн ёзчиез. Кылбурчилэн кылбуръёсаз но кырзанъёсаз шуккиськись куараез котьку сюлэмъёсамы улоз.

(Анна Бородина)