Логотип института удмуртской филологии, финно-угроведения и журналистикиИнститут удмуртской филологии,
финно-угроведения и журналистики

Слабовидящим

Степан Широбоков

(1912 – 1983)

Степан Широбоков

Степан Павлович Широбоков – Удмуртиысь калык гожъясь – вордиськиз 18-ти толсуре 1912-ти арын Шаркан ёросысь Вортча Починка (Малый Казес) гуртын куанер крестьян семьяын.

Трос аръёс чоже улэ Дебёсын. 1928-ти арын Можга педтехникуме дышетскыны пыре. Бератазгес, 1930-ти арын, Дебёс педтехникуме дышетскыны выже. Сое йылпумъяса, 1937-ти арозь школаын ужа. 1937-ти арысен Ижкарысь учительской институтысь естественно-географической факультетаз дышетске. Дебёс ёросысь Тольёнской 7 классъем школаын географиен но биологиен дышетись луыса ужа.

1939-ти арын Финской войнае ожмаськыны кошке, 1942-ти арысен – Быдзым Атыкай ожмаськонэ. Отын со шофёр луэ. Быдзым Атыкай оже кошкемезлэсь азьло, коня ке дыр чоже председатель луыса ужа. Фронтысь бертэм бераз, инспектор, Дебёсысь РОНО-ын заведующий, «Советской Удмуртия» газетын, Удмуртия издательствоын редактор луыса ужа. 1978-ти арысен Ижкаре улыны выже.

Ожысь бертэм бераз ик, Степан Павлович кышнояське. Но семья улонэз солэн оз радъяськы. Нырысети кузпалыныз люкиське. Кыкети кышноеныз шудо улэ: трос гожъяське, улыса-вылыса калык кылбурчи – котькинлы тодмо адями – луэ. 1951 арысен со – Гожъяськисьёслэн Огазеяськонзылэн ёзчиез.

Степан Широбоковлэн нырысети кылбуръёсыз 1930-ти арын «Гудыри» газетын печатласько. Нош 1945-ти арын солэн нырысети кылбур бичетэз потэ, кудиз нимаське «Ожмаськон лудын», ар улыса – «Кык вынъёс» поэмаез. Степан Широбоковлэн кылбуретаз, вань мукет лирикъёслэн сямен ик, ог-выллем темаос пумисько: ас шаердэ, пичи родинадэ данъян, яратон, шудо улон, шумпотон но инкуазез котыр ласянь чеберен, яаркыт буёлэн суредан. Солэсь гожъяськонзэ куинь люкетлы висъяны луоз: граждан лирика, ожмаськон лирика но яратон лирика.

Гражданской лирикаяз бадзым инты басьтэ шудо улонэз возьматон, шудо улонлы оскон. Мукет сямен вераса, синмаль дунне кузёяське («Кемалась малпанъёс» сборник). Ваньмыз со таче образъёс пыр возьматиське: йылтэм-пумтэм ю-нянен гыась бусы, бадзым вож нюлэс, паськытэсь вольытэсь сюресъёс, тулыс, чукна, ошмес. Чем дыръя бусы но чукна образ пумиське, тужгес но со тулыс чукна. Инкуазез суредакуз Степан Широбоков – поэт-созерцатель. Поэт инкуазьлэсь чеберзэ адзе, солэн пачылме чеберен мылкыдыз. Тужгес но яркыт луэ та ласянь «Россия» кылбур:

     Тонэ лымы-а шобыртэ,
     Лудын тудву-а куашетэ,
     Ю-нянь-а веттаське, шудэ,
     Сизьыл нюлэс-а льолектэ –
     Россия, котьку тон чебер!
     Россия – вордиськем шаер!

Ож лирикаысьтыз кылбуръёсыз верало, солэн лирической героез зэмос патриот шуыса. Та кылбуръёсысьтыз вань кылъёсаз пычамын тушмонлы пунэмзэ берыктонэн. Валтись лирической героез – солдат, кудиз ялан тодаз вае вордиськем шаерзэ, яратоно нылзэ. Вордиськем шаерез но яратоно адямиез солы юртто, ожмаськыны кужым сёто кадь. Ож бырем бере Степан Широбоков войналы сизем кылбуръёс оз ни гожъя.

Яратонлы сизем тема Степан Широбоковлэн творчествояз нимысьтыз инты басьтэ. Вань кылбуръёсаз сямен нылкышнолы яратонэз юн герзаськемын инкуазен, со люконтэм ас шаередлы яратонлэсь. Степан Широбоковлэн гожъяськоназ яратон – со шумпотон но, куректон но, ватэм яратон, яратоно нылыныд данъяськон. Лирической герой ас гажанзэ яратэ ужамез понна. Чемысь кык яратись муртъёс ужын пумисько.

Яратонлы сизем кылбуръёсаз вань сычеосыз, кудъёсыз гожтэмын нылмуртлэн синмыныз. Степан Широбоков таче шом удмурт литературае нырысьсэ пыртиз. «Ой быгаты вунэтыны» кылбураз со туж умой адзиське.

Кырбуръёсыз капчи мылкыдоесь, кырзанлы матынэсь луэмзы понна, ачиз но кылбуръёссэ вольыт, учы кадь лыдземез понна, Степан Широбоковез «удмурт учы» нимазы.

С. П. Широбоков ас удысаз базым пытьы кельтиз прозаын но, кылбуретын но, драматургиын но, нош тужгес но – калыклэн йырсазяз. Юнме овол, Степан Широбоковлы нырысьсэ Удмуртиысь калык кылбурась дано ним сётэмын.

(Надежда Никитина)