Институт удмуртской филологии, финно-угроведения и журналистики

21-тӥ коньывуонэ Удмурт кылосбуръя, финно-угроведениея но журналистикая институтын «Мон – профессионал» 3-тӥ Олимпиада ортчиз. Со «Основной но средней школаын дышетон» («Преподавание в основной и средней школе») компетенцияя радъяськиз. Таяз аре кужымзэс мертазы но быгатонлыкъёссэс эскеризы 4-тӥ курсысь студентъёс: Русских Александра, Селиверстова Александра, Наговицына Татьяна, Ильина Татьяна, Ильина Екатерина но Ситникова Мария. Нимысьтыз тау соослы дӥсьтэмзы но ӵошатскыны мылкыдзы понна! Конкурсантъёс «Уг яратскы ӵышкем писпуосты» темая удмурт литературая учебной занятие дасязы но возьматӥзы; со сяна, «Нош малы Енисей тулкыме шуккиське Кам сярысь удмурт гур?» темая интерактив амалэн дышетон тӥрлык кылдытӥзы. (Нялтас вераса, азьланяз кун экзаменъёс ӵапак таӵе кабен – урок возьматыса – радъяськозы). Студентъёслэсь ужъёссэс, трос пӧртэм критерийёсты кутыса, дунъязы Л.П. Федорова, С.Т. Арекеева но С.Н. Чернова. Конкурсантъёслэсь заданиосты быдэстэмзэс чаклаз, огъянъёс лэсьтыку, котьку сямен тунсыкоесь малпанъёссэ вераз «Вордскем кыл» журналын ужась И.Ф. Тимирзянова.

Ӵошатскон возьматӥз, ваньмызлэн студентъёсмылэн умой дышетӥсь луон понна устоесь быгатонлыкъёссы вань. Азьланяз соосты волятоно но муромытоно гинэ луоз.

Олимпиадаын вормисе потӥзы: Мария Ситникова (1-тӥ инты), Татьяна Ильина (2-тӥ инты), Селиверстова Александра (3-тӥ инты). Ӟечкыласьком но шумпотэммес вераськом!

Тау кариськом 1-тӥ курсысь студентъёслы но: Виктория Глуховалы, Анна Мельниковалы, Юлия Ершовалы, Марина Васильевалы, Елизавета Васильевалы, Алëна Макаровалы, Елизавета Калашниковалы. Соос, волонтёр луыса, быдэстӥзы нылпиослэсь-дышетскисьёслэсь рользэс но туж мыло-кыдо юрттӥзы егит дышетӥсьёсмылы, тунсыкоесь юанъёс но визьмоесь ответъёс сётъяса. Таӵе дышетскисьёсын конкурсантъёслы зэмзэ но капчи вал ужаны! Нош азьланяз, малпаськом, соос асьсэос но «Я – профессионал» но Worldskills ужрадъёсы пыриськозы.

Фото источник