Логотип института удмуртской филологии, финно-угроведения и журналистикиИнститут удмуртской филологии,
финно-угроведения и журналистики

Слабовидящим

Анатолий Григорьев

(07.08. 1952)

Анатолий Григорьев

Анатолий Григорьев вордскиз Можга ёросысь Бадзым Сибы гуртын (татын ик дано драматург Игнатий Гаврилов но вордиськемын). 1974-ти аре удмурт кун университетын удмурт ёзэтэз йылпумъяз. Трос аръёс чоже журналист луыса элькунысь портэм газетъёсын но журналъёсын ужаз, со дыре ик улонзэ Удмурт драмтеатрен герзаз. Али со отын валтись режиссёрлэн юрттисез луыса ужа. Кышнояськемын, нылыз Светлана УдГУ-ысь удмурт-финн ёзэтэз йылпумъяз.

Ан. Григорьевлы куамын куинь вал, куке удмурт сцена вылэ вуиз солэн одигез яркыт спектаклез – «Лысву сямен уг толзы синкыли». Та пьесаын Макеев удмуртъёслэн семьязы возьматэмын. Пересь кышномуртлэн Педоралэн пиез Олексан пуш куректонзэ аракыен кысэ, угось кышноез секыт висьыса улонысь кошкиз. Соизлэн пиез Валера школаез йылпумъя, пияшлэн йыраз – чебер дуно арбериос но ужатэк коньдон поттыны турттон гинэ. Нылыз, Нина, яратоно пиез сьоры каре кошкыны уг быгаты, угось татын юртъерез кутись кыльыны кулэ. Пересь Педора вань семья сюлмаськонъёсты ас вылаз басьтэ. Туннэ нуналозь со войнае кошкем картсэ возьма, уг оскы, соиз ожын быриз шуыса. Озьы А. Григорьев одиг семья пыр куинь выжы-поколениосты возьматэ – егитъёсты, ардыдоосты но пересьёсты, соос вискысь куашкась кусыпъёсты. Та вакытэ Афганистанысь Аркадий пизы бертэ (солы секыт операциез ортчоно, но гуртысьёсыз та сярысь номыр уг тодо). Ожгарез адзем офицер Аркадий ас дорысьтыз улонэз радъяны кутске, Валераез ас удысаз кыскыны быгатэ. Та нырысети пьесаын вань на лябыт интыосыз, геройёслэн выросъёссы но вамышъёссы котыр ласянь юнматэмын овол. Озьы ке но, автор дурыстэм юон, ожгаръёс, палдурскем егитъёс, семьятэк кылем пиналъёс сярысь ужпумъёсты жутэ.

Туалалыкез возьматон «Атас Гири» (1986) комедиын но азьпал радэ потиз. Татын огинэ вуизы выли мылкыд, гротесклык но ултияса серекъян. Геройёслэн вераськон кылзы узырмиз. Кисальгуртысь Лиза вазь чукна ик Гиризэ пось табанен сайкатэ. Тани Лизилэн апаез Лукерья вузкаронниысь бертэ но ивортэ, уйин Гири шабашникъёслэсь йырзэс Капырьяновез жугем шуыса. Жоген вуэ милиционер Дарья Сергеевна, со сьоры ик «кырсь киё» ветеринар Максим Майталов. Атас Гири вылэ «уж» пораны кутско, но соиныз номыр каремзы уг луы – Гири летарги уйвотэ усемын. Таче герой удмурт театр понна огдыре ик дышымтэ но, соку ик паймымон маке но вал. Серемес учыръёс огзы борсьы мукетъёсыз ортчо, адямиослэн пушдуннезы шодтэк шорысь палъёсыныз усьтискылэ. Бухгалтер Леночка кыл волдисьёс полы кыстиське, Дарья пенсие потонэз сярысь сюлмаське, Матрон апай Лукерьялэсь коньдонзэ портыны турртэ, соизлэсь куке но Гири пунэмалляз шуыса. Лукерья но эмеспиез шоры «хамелеон» сямо учке. Нош Атас Гири летаргии уйвотэз юромо «шудэ» , Майталов ветеринарлэн мыдлань диагнозэзлы тупатскыса. Капырьянов аракы юэменыз шузиме но турын сиыны кутске, тодосчи-японец шодтэк шорысь ас гурысьтызы потэм Михаиллы порме. «Атас Гири» комедиын Ан. Григорьев возьматэ, кызьы коньдон сьоры уиськон адямиослэсь улонзэс соре.

1990-ти аре Анатолий Григорьев Россиысь писательёслэн огазеяськоназы кутэмын. Коня ке улыса, сцена вылэ «Эмезь кисьмаку» (1994) комедиез вуэ. Шудон ӧр гужем, эмезь кисьман вакытэ ортче. Пислегин Африкан пойшураны кошке но сьораз мотоцикл коляскаяз Лымы Адямиез вае. Та пойшур-адями пьесалэн валтись героез луэ. Укыр бадзыматон но, гротесклык но геройёс понна огшоры маке выллем потто, котькин та Лымы Адями пыр аслыз коньдон поттыны турттэ. Африкан фермер луыны малпа, нош та изьвер солы дунтэк ужалоз, пе. Мукетыз герой та Лымы Адямиез тодосчиослы бадзым дунэн вузаны малпа, нош поттэм уксёеныз аслыз сур позьтон завод басьтысал вылэм. Лымы Адямиез адзон понна палэнысьёслы коньдон тыроно луэ, макем со дун будэ (вить манетысен сюрсозь). сокем укылтэмесьгес луо геройёсмы. Лымы Адями уг чида но «масказэ» куштэ, со – ас гуртысьтызы ик Микол агай вылэм. Лымы Адями, кияз пычал кутыса, сцена сьоры кошке. Озьы спектакль йылпумъяське, пьесаез учкисьёсты малпаськонъёсазы выйытыса. Угось Лымы-Аями трослы «адямиколыкогес» луэ, гуртын улисьёсын чошатоно ке.

Удмурт комедия жанрез азинтон удысын Ан. Григорьевлэн висъямон луо озьы ик «Парсьпи но эмеспи» (1998) но «Атас Гири-2» (2011) ужъёсыз, кудъёсыз азьло сямен ик гурт улонэз возьматонлы сиземын. Нырысяз комедиын серемес учыръёс кылдо, куке кык бускельёс ог-огенызы керетыса улыны кутско, ог-огзылэн корка котыразы кулэм парьпиез куяло. Со дыре ик серемес «технологиос» но возьматэмын, куке, шуом, Микол шланг пыр бускелезлэн муржолысьтыз брагазэ-аракызэ лушкем юыса улэ. «Атас Гири-2» комедия азьвыл пьесалэсь пуштроссэ азинтэ, автор серем пыр возьматэ, улонлэн зэмлыкезлы оскон быдэсак быремын ни шуыса, берпумети сюрес – пытсэт сьорын пукем йыружчиослы вазиськон но соослэн «зэмлыксылы» оскон. Тросэз учкисьёслы комедилэн пумыз оз кельшы ке но, соглаш луизы, авторлэн йылпумъянэз тазьы но луыны быгатэ шуыса.

«Пужмерен чуштаськем яратон» пьесаын возьматэмын 1990-ти аръёсысь секыт югдур, куке ужась калык туж вакчи дыр куспын куанермиз. Пьесаысь геройёс ас сюлэмазы азьвыл вакытэз возё но утё, отысь вань шуг-секытъёсты умой валало ке но. Соослэн югытлы но зэмлыклы осконзы бадзым, но асьсэлэн шудбурзы понна соос нюръяськыны уг быгато. Пьесаын кузёяське адямиосты жалян мылкыд.

Анатолий Григорьев серемес веросъёс (юморескаос) гожъян удысын но тырше, ас ужъёссэ сцена вылысен лыдзе. Удмурт кылэ берыктон удысын пусйымонэсь луо Ж,-Б. Мольерез, А. Макаёнокез, В. Винниченкоез но мук. драматургъёсты удмурт сцена вылэ вуттэмез ласянь.

(Валерия Поткина, Татьяна Зайцева)