СлабовидящимСлабовидящим

Анатолий Григорьев

(07.08.1952)

Анатолий Григорьев

Анатолий Григорьев вордскиз Можга ёросысь Бадӟым Сибы гуртын (татын ик дано драматург Игнатий Гаврилов но вордӥськемын). 1974-тӥ аре удмурт кун университетын удмурт ёзэтэз йылпумъяз. Трос аръёс ӵоже журналист луыса элькунысь пӧртэм газетъёсын но журналъёсын ужаз, со дыре ик улонзэ Удмурт драмтеатрен герӟаз. Али со отын валтӥсь режиссёрлэн юрттӥсез луыса ужа. Кышнояськемын, нылыз Светлана УдГУ-ысь удмурт-финн ёзэтэз йылпумъяз.

Ан. Григорьевлы куамын куинь вал, куке удмурт сцена вылэ вуиз солэн одӥгез яркыт спектаклез – «Лысву сямен уг тӧлӟы синкыли». Та пьесаын Макеев удмуртъёслэн семьязы возьматэмын. Пересь кышномуртлэн Педоралэн пиез Олексан пуш куректонзэ аракыен кысэ, угось кышноез секыт висьыса улонысь кошкиз. Соизлэн пиез Валера школаез йылпумъя, пияшлэн йыраз – чебер дуно арбериос но ужатэк коньдон поттыны турттон гинэ. Нылыз, Нина, яратоно пиез сьӧры каре кошкыны уг быгаты, угось татын юртъерез кутӥсь кыльыны кулэ. Пересь Педора вань семья сюлмаськонъёсты ас вылаз басьтэ. Туннэ нуналозь со войнае кошкем картсэ возьма, уг оскы, соиз ожын быриз шуыса. Озьы А. Григорьев одӥг семья пыр куинь выжы-поколениосты возьматэ – егитъёсты, ардыдоосты но пересьёсты, соос вискысь куашкась кусыпъёсты. Та вакытэ Афганистанысь Аркадий пизы бертэ (солы секыт операциез ортчоно, но гуртысьёсыз та сярысь номыр уг тодо). Ожгарез адӟем офицер Аркадий ас дорысьтыз улонэз радъяны кутске, Валераез ас удысаз кыскыны быгатэ. Та нырысетӥ пьесаын вань на лябыт интыосыз, геройёслэн выросъёссы но вамышъёссы котыр ласянь юнматэмын ӧвӧл. Озьы ке но, автор дурыстэм юон, ожгаръёс, палдурскем егитъёс, семьятэк кылем пиналъёс сярысь ужпумъёсты ӝутэ.

Туалалыкез возьматон «Атас Гири» (1986) комедиын но азьпал радэ потӥз. Татын огинэ вуизы выли мылкыд, гротесклык но ултӥяса серекъян. Геройёслэн вераськон кылзы узырмиз. Кисальгуртысь Лиза вазь ӵукна ик Гиризэ пӧсь табанен сайкатэ. Тани Лизилэн апаез Лукерья вузкаронниысь бертэ но ивортэ, уйин Гири шабашникъёслэсь йырзэс Капырьяновез жугем шуыса. Ӝоген вуэ милиционер Дарья Сергеевна, со сьӧры ик «кырсь киё» ветеринар Максим Майталов. Атас Гири вылэ «уж» пӧраны кутско, но соиныз номыр каремзы уг луы – Гири летарги уйвӧтэ усемын. Таӵе герой удмурт театр понна огдыре ик дышымтэ но, соку ик паймымон маке но вал. Серемес учыръёс огзы бӧрсьы мукетъёсыз ортчо, адямиослэн пушдуннезы шӧдтэк шорысь палъёсыныз усьтӥськылэ. Бухгалтер Леночка кыл вӧлдӥсьёс пӧлы кыстӥське, Дарья пенсие потонэз сярысь сюлмаське, Матрон апай Лукерьялэсь коньдонзэ портыны турртэ, соизлэсь куке но Гири пунэмалляз шуыса. Лукерья но эмеспиез шоры «хамелеон» сямо учке. Нош Атас Гири летаргии уйвӧтэз юромо «шудэ» , Майталов ветеринарлэн мыдлань диагнозэзлы тупатскыса. Капырьянов аракы юэменыз шузиме но турын сиыны кутске, тодосчи-японец шӧдтэк шорысь ас гурысьтызы потэм Михаиллы пӧрме. «Атас Гири» комедиын Ан. Григорьев возьматэ, кызьы коньдон сьӧры уиськон адямиослэсь улонзэс сӧре.

1990-тӥ аре Анатолий Григорьев Россиысь писательёслэн огазеяськоназы кутэмын. Кӧня ке улыса, сцена вылэ «Эмезь кисьмаку» (1994) комедиез вуэ. Шудон ӧр гужем, эмезь кисьман вакытэ ортче. Пислегин Африкан пӧйшураны кошке но сьӧраз мотоцикл коляскаяз Лымы Адямиез вае. Та пӧйшур-адями пьесалэн валтӥсь героез луэ. Укыр бадӟыматон но, гротесклык но геройёс понна огшоры маке выллем потто, котькин та Лымы Адями пыр аслыз коньдон поттыны турттэ. Африкан фермер луыны малпа, нош та изьвер солы дунтэк ужалоз, пе. Мукетыз герой та Лымы Адямиез тодосчиослы бадӟым дунэн вузаны малпа, нош поттэм уксёеныз аслыз сур пӧзьтон завод басьтысал вылэм. Лымы Адямиез адӟон понна палэнысьёслы коньдон тыроно луэ, макем со дун будэ (вить манетысен сюрсозь). сокем укылтэмесьгес луо геройёсмы. Лымы Адями уг чида но «масказэ» куштэ, со – ас гуртысьтызы ик Микол агай вылэм. Лымы Адями, кияз пыӵал кутыса, сцена сьӧры кошке. Озьы спектакль йылпумъяське, пьесаез учкисьёсты малпаськонъёсазы выйытыса. Угось Лымы-Аями трослы «адямиколыкогес» луэ, гуртын улӥсьёсын ӵошатоно ке.

Удмурт комедия жанрез азинтон удысын Ан. Григорьевлэн висъямон луо озьы ик «Парсьпи но эмеспи» (1998) но «Атас Гири-2» (2011) ужъёсыз, кудъёсыз азьло сямен ик гурт улонэз возьматонлы сӥземын. Нырысяз комедиын серемес учыръёс кылдо, куке кык бускельёс ог-огенызы керетыса улыны кутско, ог-огзылэн корка котыразы кулэм парьпиез куяло. Со дыре ик серемес «технологиос» но возьматэмын, куке, шуом, Микол шланг пыр бускелезлэн мурӝолысьтыз брагазэ-аракызэ лушкем юыса улэ. «Атас Гири-2» комедия азьвыл пьесалэсь пуштроссэ азинтэ, автор серем пыр возьматэ, улонлэн зэмлыкезлы оскон быдэсак быремын ни шуыса, берпуметӥ сюрес – пытсэт сьӧрын пукем йыружчиослы вазиськон но соослэн «зэмлыксылы» оскон. Тросэз учкисьёслы комедилэн пумыз ӧз кельшы ке но, соглаш луизы, авторлэн йылпумъянэз тазьы но луыны быгатэ шуыса.

«Пужмерен ӵуштаськем яратон» пьесаын возьматэмын 1990-тӥ аръёсысь секыт югдур, куке ужась калык туж вакчи дыр куспын куанермиз. Пьесаысь геройёс ас сюлэмазы азьвыл вакытэз возё но утё, отысь вань шуг-секытъёсты умой валало ке но. Соослэн югытлы но зэмлыклы осконзы бадӟым, но асьсэлэн шудбурзы понна соос нюръяськыны уг быгато. Пьесаын кузёяське адямиосты жалян мылкыд.

Анатолий Григорьев серемес веросъёс (юморескаос) гожъян удысын но тырше, ас ужъёссэ сцена вылысен лыдӟе. Удмурт кылэ берыктон удысын пусйымонэсь луо Ж,-Б. Мольерез, А. Макаёнокез, В. Винниченкоез но мук. драматургъёсты удмурт сцена вылэ вуттэмез ласянь.

(Валерия Поткина, Татьяна Зайцева)