СлабовидящимСлабовидящим

Воръявай Васьлей

(Василий Михайлович Ванюшев)

(10.02.1936)

Воръявай Васьлей

Василий Ванюшевлэн кылбуран дуннеяз тужгес но висъямон луо гражданской тематикаё ужъёсыз. Быдӟым Атыкай Ожгарлы сӥзем чуръёсыз но, ас вордӥськем палэз пумысен сюлмаськонъёсыз но (солэн вордскем Кусо Какся гуртэз али быремын ни), удмурт калыкенымы выльдӥськон бере кылдэм шугадӟонъёс но, тодос удысысь малпанъёсыз но (Иднакар пумысен, Г. Верещагинлэн кылёсбурез пумысен), удмурт кылэз, удмуртлыкмес утьыны тыршонъёсыз но – ваньмыз со литератураямы яркыт пытьы кельтӥз. Пияшлэсь гожъяськон мылкыдзэ ӝутӥз ньылетӥ классын дышетӥсез Д. И. Тимофеев. Печатласькыны кутскиз, Можга педучилищеысь Е. А. Коноваловалэн кивалтоно литературной кружоказ ветлыкуз. Соку ик гожъямъёссэ синйылтӥзы но быгатэмезлы оскон сётӥзы дано удмурт писательёс М. П. Петров но Т. А. Архипов.

Нырысь бичетъёс. Василий Ванюшевлэн «Выжыосы» (1976) нырысетӥ кылбур бичетэз печатласькыку, удмурт кылбуретлэсь визылзэ Флор Васильев ӧръя на вал. Бадӟым дышетӥсеныз кенешон тужгес но шӧдӥськиз «Гажан мерттос» кылбурын. Флор Васильев гожтӥз вал: «Нылыд-пиед вордскиз ке семьяяд, / Укно улад ик мертты тон льӧмпу» («Мертты тон льӧмпу»). В. Ванюшев та чуръёс борды итӧськыса азинтэ:

     Ӧз вордӥськы война дугдон аре
     Солдат юртын мусо, ненег нуны,
     Но кышномурт тулыс потӥз кыре,
     Мерттӥз льӧмпу, малпаз будэтыны.
     Быриз солдат. Уз вордскы нунызы.
     Но та мерттос – гажамзылэн пизы».

Берлогес та ненег льӧмпу вӧзы быдэс сад кылдэ, угось карттэк кылем мукет нылкышноос но ас мылкыдзэс буйгатон понна татчы писпуос мертто. Озьы вож сад «пыӵатӥз пумтэм кульчоосаз секыт ожлэсь утем яратонэз». Граждан ожлэсь туала вакытозь кылем огзэ пытьызэ В. Ванюшев яркыт возьматэ «Пужым» кылбураз: «Пересь пужым пушкын улэм / Куке мертчем снаряд пыры». В. Ванюшев граждан темаен кылбуръёссэ огшоры кылсуредъёс но ӧтёнъёс-индылонъёс вылын уг лэсьты (1970-тӥ аръёсы та ужпум угось патриотической лирикалэн валтӥсь висёнэз луиз ни вал), кылбурчи бадӟым огъянэ-йылпумъянэ кыӵе ке деталь пыр мынэ. Та тодмет «Шунды но Гудыри» (1980) бичетын уката но кужмояз, азьпал радэ потӥз. А. Ермолаевлэн пусъемезъя, улонысьтымы ӟечез но уродэз вискын нюръяськон азьпал радэ потэ, зэм, та валатонъёсты В. Ванюшев герӟаны тырше «дауръёс ӵоже юнмам тодметъёсын».

Удмуртлык но мифдунне. Ф. Васильевен артэ ик В. Ванюшев яркыт возьматэ аслэсьтыз «пичи дорзэ», аслаз чуръёсаз вашкала удмурт осконъёсты но соосын герӟаськем сямъёсты, валатонъёсты ужаз кутэ. Гитаралэсь сизьым сизэ возьматэмъяз кылбурчи арнялэсь сизьым удмурт нимъёссэ тодэ вайытэ («Гитара»). Вордӥськем гуртэзлэсь кылдэмзэ кылбурчи тазьы маде:

     Гуртмес озьы шуо: кусо Какся.
     Какся выжы кин ке лыктэм, лэся,
     Кусо выллем губрес шурлэн дураз
     Юртсэ лэсьтэм со вашкала дыръя.
     Со дырысен кутскем милям выжы –
     Пичи люкет бадӟым шаерамы.

«Ондрей кыз» кылбурын возьматэмын вашкала удмурт сям, кызьы удмурт воргоронъёс, ожгаре кошконзы азьын, асьсэлы кельшись писпуэз «йыръялляло» вылэм, соосъя ик гурт калык тодоз, пе, улэп на-а кыдёке кошкем ожчи яке со быремын. Миф пуштросэн пӧрмытэмын «Тутык мувыр» кылбур но.

Озьы «Шунды но гудыри» бичетын «пичи дор» («шыпыт лирикалэн валтӥсь тодметэз) но «бадӟым дор» (эстрадной лирикалэн тодметэз) огинэ вуизы, соослы луысагес ик книгаын кыкез люкетъёс но нимысьтыз висъямын; нырысетӥез нимаське «Милям гуртмы», нош кыкетӥез – «Быдэс дунне тӧлын шока, оло…». Та вакытэ ик Ванюшев-тодосчи «Расцвет и сближение» монографиез бордын ужа бере, Россиысь но социализмо кунъёсысь калыкъёсын эшъяськон тема та тодослыко книгаын яркыт адӟиське.

Нылпиослы сӥзем книгаосыз («Вить чиньы – одиг кикур», «Солнечный каравай». «Дедушкин родник», «Колосок, задевший небо» но мукет). Ӟуч критикаын, уката ик Москваын, та бичетъёс сярысь ас вакытаз бадӟым но умой вераськон ӝутскылиз (Л. Рудской, В. Владимирова, Е. Дунская, В. Кононов, М. Стаханова). Нылпиослы сӥзем бичетъёсаз В. Ванюшев яркыт возьматыны тыршиз удмуртъёслэсь дунне шоры аспӧртэмлыко учкемзэс, угось книгалэн нимыз ик – «Колосок, задевший небо» – тодэ вайытэ удмуртъёслэсь «ин» но «шепъёс» сярысь мадёссэс, текстын со сярысь шара верамтэ ке но. Нош куинь пӧртэм валъёслэн вошъяськемзы (ӵукна – ӵуж яке сари вал, нунал – тӧдьы вал, уй – сьӧд яке кельыт вал) тодэ вайытэ удмурт батыръёслэсь выж вылэ пыремзы азьын валъёссэс вошъямез. Со вакытэ ик ӟуч критикъёс шонер пусйизы, берыктӥсьёс удмурт образъёслэсь яркыт буёлъёссэс зол гинэ бездытӥллям шуыса.

«Шунды-Мумы» (1995) бичет «ельцинизм» вакытлы дунъет сётӥсь книга выллем луиз, кудысьтыз граждан тематикаен сузьетэз «пумитъяськон» шуыса ниманы луэ, отын улон радлэн куашкамез, йырчукин луэмез возьматэмын но соин валче кылдэм сюлэм висён шараямын. Нырысь ик син шоры йӧтэ кылбурчилэн «Вожмин» поэмаез. Та сузьетэ ик пыро «Сютэмъёс», «Тылпу», «Ку?» но мукет кылбуръёс. Нимысьтыз висъяське удмуртлыкез но удмурт кылэз ултӥянлы пумитъяськон («Арыслан», «Быръёнъёс», «Удмурт кыл» но мук.). Асьсэ пуконъёссы но кисыоссы понна гинэ сюлмаськись кузёослэн быдӟым державамес люкылэмзы, таркамзы-кесямзы яркыт возьматэмын гротеск амалэн гожтэм «Аслам!» кылбурын.

Граждан тематикаез азинтыса, Василий Ванюшев меӵак гожъя удмуртлыкмес утён сярысь («Одӥг куиньмос», «Ачим кадь ик удмурт эшелы», «Янгыш-а мон?»), куддыръя публицист луэмзэ но уг ваты:

     Одӥг куиньмос гинэ, пе, кылемын
     Удмуртиысь калык пӧлын удмурт.
     Ини пыкылонэз но кылимы:
     Сьӧрлось муртэз кариськомы, пе, мурт /…/
     Зэм, кикыпи мурт нылпиос пӧлын
     Одно ик бушатэ, пе, аслыз кар.

«Меми гожтэт» но «Иднакарын» поэмаос. «Меми гожтэт» куинь люкетлы висъяське, Быдӟым Атыкай ожгарлы сӥземын. Огшоры удмурт гуртысь кышномурт, ньыль пиналъёслэн анайзы, бадӟым вормон понна ваньзэ чидано луэ. Куинь арнялы колхозникъёсты тэле ужаны ыстыло, иське, кин юртъерез возёз? Но маиныз уката но висъяське та поэма – со поэмаысь героинялэн война вакытэ лыдӟиськыны-гожъяськыны дышетскемез. В. Ванюшев огаз интервьюаз тазьы гожтӥз: «Гожтэтлы дышетскон дыр вал-а война вакытэ огназ ньыль нылпиен кылем кышномуртлы? Нош меми басьтӥськиз дышетскыны. Тол ӝытъёсы ӵындӥсь керосин лампа дорын сое, ужысь жадьыса бертэм муртэ, Душа апае гожъяськыны дышетӥз. Ӝоген фронтэ, атаймы доры, мемилэн печатной букваосын сазнам вакчи гожтэтъёсыз лобизы. Война аръёсы гуртэ кылем кышномуртъёслэн вормыны быгатэмзылы паймымон но вераса быдтонтэм ужъёссы пӧлысь та одӥгез вал: фронтысь картэзлы ӟеч карон понна гожъяськыны дышетскиз мемимы». Озьыен, поэма В. Ванюшевлэн улонысьтыз зэмос учырез басьтыса гожтэмын.

Мукетыз поэма – «Иднакарын» – герӟаськемын Глазкар дорысь вашкала карез копамъёсын (та ужен со аръёсы кивалтӥзы К.И. Куликов но М.Г. Иванова), отысь шедьтэм узырлыкъёс пумысен кылдэм мылкыдъёсын. Дас вить ар ортчыса, В. Ванюшев нош ик та поэмаез борды берытске, выльдэ-узырмытэ, выль люкетъёс ватса, со дыре ик поэмалэсь пумзэ но мукетгес каре. 2013-тӥ арын текст огдыре удмурт, француз но ӟуч кылын печатлаське. Ванюшев-тодосчи, М. Худяковлэсь но Д. Яшинлэсь ужзэс азинтыса, трос тырше удмурт батырлыко эпос бордын, ачиз М. Худяковлэсь «Песнь об удмуртских батырах» эпоссэ удмурт кылэ эрико берыктэ («Дорвыжы» нимын).

Иднакар – удмуртъёслэн данъяськон но шумпотон синпельметсы, «улонэз-луосэз» возьматӥсь книга-лыдӟет: «Бадӟым книга кадь / Та удмурт музъем. / Кӧня даур / Пыӵатэмын пушказ?!» Секыт выльдӥськон вакытъёс дыръя ӵапак вашкала Иднакар удмуртъёслы ӵуказемес югытгес буёлъёс пыр учкыны луонлык кылдытӥз, угось вашкалалыкез гажан – со толло нуналлэсь мӧзмон гинэ ӧвӧл, со – глобализация вакытэ ӵуказе нунал понна нюръяськон, куке тросэз-тросэз кылъёс бырон калэ вуыны кутско.

«Удмурт выжы книга»-ын валтӥсь герой – со «мон» образ, асьме вакытэ улӥсь мурт, кудӥз сак чакла археологъёсмылэсь ужамзэс, сюлэменыз шӧдэ IХ–ХIII дауръёсысь ӵыжы-выжыосмылэсь улон-вылонзэс. Прозалэн но кылбуретлэн полэстӥськыса мынэмзы нимысьтыз выль пуштрос кылдытэ, геройлэсь пушдуннезэ усьтэ – огласянь, со историк, мукет ласянь – кылбурчи. Озьы кык пӧртэм «дыр-вакыт» валатон кылдэ, кытын туннэез толлоеныз герӟаськемын, нош толло вакыт ас пушказ ӵуказеез возе.

Литературатодос но публицистика. В. Ванюшев пыриськиз «Мултан уж» сярысь кык сериен «Мултанское дело» (1994, режиссер Л. Вахитов) фильмез кылдытонэ, война дыръя Дебесын улэм но быронлэсь утем литва нылъёс но пиос сярысь «Дети с небес» (Вильнюс: «Студия Ю», 2006, режиссер Н. Юхневич) кинофильмез но «Удмуртские любовные игры» (крезьгурчи Е. Копысова) ораториез лэсьтонэ, В. М. Ванюшев ӟеч кусыпъёс тупатӥз Чувашиысь тодосчиосын но гожъясьчиосын. Солэн юрттэменыз Чебоксарын чуваш кылын поттӥзы удмурт литературалэсь антологизэ (1993), солэсь аслэсьтыз но музон удмурт писательёслэсь (К. Гердлэсь, В. Ар-Сергилэсь, П. Черновлэсь, Л. Кутяновалэсь) кылбуръёсын, веросъёсын, очеркъёсын книгаоссэс. Публицистика удысын висъясько «Вокруг Мултана: тень на плетень» споръяськись статья сузьетэз (1993) но «Кин шоры «ыбылэ» Мултан уж?» (1994) документальной очеркез. Василий Ванюшев умой кусып тупатӥз Парижысь Жан-Люк Моро француз тодосчиен но кылбурчиен, Хельсинкиын али докторантураын дышетскись Еса-Юсси Салминенэн, кудӥз Йорма Ваккури кылбурчиен валче кариськыса 2009-тӥ арын фин кылын поттӥз удмурт кылбурчилэсь но тодосчилэсь дасям «Дорвыжы» книгазэ. В. Ванюшев трос аръёссэ ужа ни нырысетӥ удмурт тодосчилэсь но писательлэсь Г. Е. Верещагинлэсь дано нимзэ но ужъёссэ калыке берыктон бордын. Журналъёсын но газетъёсын уно статьяос сяна, со поттӥз «Творческое наследие Г. Верещагина в контексте национальных литератур Урало-Поволжья» (1995) монографизэ, солэсь трос томъем Люкам сочинениоссэ дасян но печатлан ужен кивалтэ.