СлабовидящимСлабовидящим

Михаил Федотов

(7.10.1958 – 6.05.1995)

Михаил Федотов

Михаил Иванович Федотов, нырысетӥ бесермян кылбурчи, вордскиз 7-тӥ коньывуонэ 1958-тӥ арын Яр ёросысь Ворча гуртын бадӟым бесермян семьяын: «Тани вуоз ӵукна, / Пуксём ми ӝӧк сьӧры: / Ми куать кузя: / Братъёс но сузэрмы, / Анай вӧйын ӝуксэ / Ӝутоз быдэс дуры...», – гожтэ со «Берекет» поэмаяз. Пичи дырысьтыз тодэ-ваёнъёс Михаил Федотовлэн лирикаяз мур пыӵамын. М. Федотов пичи дыръяз ик суреданы дышетскиз.

Зэмос анай-атай бордын будон – со туж силы, номырин ӵошатонтэм шуд. Котьку но шуныт кылъёсын вера вал Михаил анаез-атаез сярысь, трос кылбуръёссэ сӥзиз гажано адямиосызлы, оглом бесерман калыклы («Мушник», «Э-э, ӟеге тон, ӵуж ӟеге..», «Колодча дурын», «Атаелы», «Бадяр», «Кырӟалом, анай»).

     Анае но дасялоз вал
     Бессермян дӥсьсэ,
     Кашпузэ но со кертоз вал
     Кутчалоз кутсэ.

Миша Федотов школае мынӥз 1965-тӥ аре, Ворча гуртын дышетскиз. Малпаське вал Миасской горной техникуме пырыны, ас палысьтыз муизъёсты люка-эскере вылэм. Но анаез сое лэзьымтэ, палэнын варгаз ӟазег кадь луод, пе.

Школаын дышетскон аръёсаз гожъяськыны кутске. Флор Васильев солы «Гужем дыр» книгазэ кузьма, собере пияшлэн кылбур гожъян мылкыдыз ӧз бырылы ни. Ас дораз, бадӟым семьяязы нокин медаз люкеты шуыса, гур вылэ ватскыса гожъяське вылэм.

1976-тӥ арын Удмурт университетэ пыре. Нырысетӥ курсын бесермян кылын вераське ай. Берло гинэ эшъёсыз сое удмурт кылын вераськыны дышетӥзы. Вераськыны могӟе вал бере (пичи дырысеныз висён), экзаменъёссэ гожъяса сётылӥз.

«Тӧдьы юсьёс берто» кылбур бичетэз дась вал ини, университетын дышетскыкуз ик (ас киын «поттэм» вариантсэ но лэсьтылӥз – «Тӧдьы юсьёс берытско»), но книгаез трослы бергес печатласькиз. 1977-тӥ арысен 1981-тӥ арозь «Советской Удмуртия», «Дась лу!», «Сельская правда» газетъёсын потало вал заметкаосыз, кылбуръёсыз, басняосыз.

1980-тӥ аре гужем атайзэ ватэ, кудӥз Быдӟым Атыкай ожгарез ортчиз: «Сьӧд куакаоc тодэ вайытӥзы / Сьӧд гу доры котыр султэм вужеръёсыз. / Со вужеръёс / Выльысь улӟытӥзы / Атай понна бӧрдэм куараосыз». Егит поэт нырысетӥ курсын дышетскыкуз ик синмаське ӵош дышетскись нылашлы, Шаркан палась Аня Ефимовалы.

Университет бере Мишаез одӥг арлы армие басьто. Казаньын лэсьто йыраз операция, нош отын висьыны кутскеменыз валче комиссовать каро, службазэ пумаз ӧжытлы гинэ ӧз вутты, Ворча гуртэ берытскиз 6-тӥ декабре 1982-тӥ аре. 1983-тӥ аре январе сюанзы ортчиз.

Армия бере М. Федотов ужаз «Советской Удмуртия» газетын корреспондент луыса. УдНИИ-ын тодосчи луыса тыршыны малпа вал, ас бесермян калыкез сярысь тодослыко ужъёс, кыллюкамъёс лэсьтыны кутскиз ни вал (диплом уженыз). Но УдНИИ-ын солы верало, ужан интыос ӧвӧл шуыса. «Молот» журналын М.Федотов кивалтӥз поэзия но критика отделэн. 1983-тӥ арысен кутскыса выже «Удмуртия» книгапоттоннилэн чеберлыко но нылпи литературая ёзэтаз, солэн кивалтӥсез луэ, ужа редактор чотын. Котькуд авторлы тыршылӥз кулэ луись дэмланъёс сётыны, авторез кулэ ӧраз валтыны. Издательствоын ужакуз ик поттӥз «Тӧдьы юсьёс берто», «Берекет», «Вӧсь» книгаоссэ.

«Тӧдьы юсьёс берто» книгаез печатласькиз 1986-тӥ аре. Рецензентэз – тодмо кылбурчи Владимир Романов, кудзэ Миша аслад дышетисеныз лыдъя вал. Ӵош дышетскем эшез, критик Александр Лаптев, тазьы вера кылбур бичет сярысь: солэн инъетэз аспӧртэмлыко, пе, автор улонысь ӟечсэ но уродзэ, адямиослэсь кусыпъёссэс, вакытмылэсь бугрессэ ортчем дырын полэстыса-пуныса, дыртытэк, огсыр малпаське. Бичетысь шӧдыны луоз Флор Васильевлэн кылбуретысьтыз куараосты но. Но гожтосъёсын тырмыт уггес шӧдӥськы на, пе, гражданской но публицистической ӟырдытэз. Книгаез лыдӟыса валаськод, шуэ А. Лаптев, кылбурчи юн яратэ вордскем палъёссэ, Яр ёросэз.

1991-тӥ арын Москваын сое СССР-ыcь писательёслэн огазеяськоназы куто. Нош феврале 1988-тӥ арын М. Федотов Удмуртиысь комсомоллэн Флор Васильев нимо литературной премиезлэн нырысетӥ лауреатэз луэ – «Берекет» нимо книгаез понна (1988). Пусъемын вал, солэн вордскем интыосыз озьы ик бадӟым инты басьто шуыса, возьматэмын шаермылэн чеберез, тужгес ик бесермян йылолъёсыз умой возьматэмын шуыса. Ваньмыз со поэзизэ национальной шӧмо каре. Талэсь азьлогес солы «Лучший по профессии» си-дан грамота сётэмын вал. Озьыен, солы улон инты басьтыны луонлык «усьтӥське» (татчыозь семьяеныз со ёркыт пу коркалэн пичи висъетаз улӥз). 17 мае 1989-тӥ аре сое келяло Москвае писательёслэн Всесоюзной кенешоназы. Отын егит кылбурчилы дэмлало ас кылбуръёссэ ӟуч кылэ берыктыны. 12 июне 1989-тӥ арын ветлэ Йошкар-Олае, нырысетӥ финно-угорской калыкъёслэн пумиськоназ делегат луыса. 12 сентябре 1990-тӥ арын пусъемын вал «Отличник печати» знакен.

Бадӟым инты басьтӥз М. Федотовлэн улоназ Владимир Романовэн эшъяськон. Нырысьсэ соос пумиськизы 1974-тӥ арын Яр палъёсын. В. Романов кулэм бере ик М. Федотовлэн улоназ кутске кризис. 1991-тӥ арын потэмын «Вӧсь» нимо книгаез, кытын автор улон но кулон темаез паськыт шарая. 1985-тӥ арын М. Федотов Ува ёросысь басьтэ аналтэм cэрегысь дунтэм пу корка. Со коркалэн кылсуредэз трос пумиське берпуметӥ сборниказ.

     Шедьтӥ, лэся, аслым берпум сэрег…
     …Та сэрегам гинэ шуныт но чус,
     Монэ гинэ кылзо буш борддоръёс.

Кылбурчи калыклэн малпанъёсаз пырыны тырше. Соин ик, лэся, чуръёсын ӵем пумисько Инмар, воршуд кылъёс, нош кӧкы, инвис, вир, вӧт, вужер, кайгу кылъёс, соос символ пуштросо луо.

«Удмуртия» книгапоттонниысь кошкыса, М. Федотов выже «Кенеш» журналэ. 1995-тӥ арын потэ солэн «Юг сюлэмын ӝуа шыртыл» нимо кылбур сузьетэз. Ньыль толэзь гинэ ужаса вуттӥз М. Федотов «Кенеш» журналын. 6-тӥ куартолэзе 1995-тӥ арын Ижкарысь одӥгаз эмъяськонниысен малпамтэ шорысь солэн сюлэмыз ужамысь дугдӥз.

Паймоно кадь, кыӵе кужмо вылэм кылбурчилэн азьпалаез сярысь шӧдонлыкез. «Уйбыртон» кылбураз со ваньзэ-ваньзэ тодэ кадь, кызьы сое ватозы («нош ваизы монэ сяськаосын»), кыӵе адямиос со котырын бергалозы («кин ке бӧрдӥз курыт синкылиен», «нош кин ке мышкам ветлэ вал кӧльыен»). Собере со гожтэ: «Пеймыт гуын потӥз мыным люкыт. / Монэ соку зор ву, лэся, эмъяз. / Ӝутски гуысь. / Пукси изэ вылэ. / Кытчы мыном, кытысь шедьтом чуслык? / Дунне вылысь кинлы на мон кулэ? / Шат кырныжлы, юстэм лек кырныжлы?»

(Елена Агафонова)