СлабовидящимСлабовидящим

Петр Захаров

(26.01.1961)

Петр Захаров

Петр Захаров удмурт литературае Владимир Романовлэн дышетскисез шуыса пыриз. Кылбур книгаосыз пӧлын «Вож выж» тужгес но висъяське. «Эбга» трагедиез асьме шаерын гинэ ӧвӧл, Финляндиын но чузъяськиз. Трос лэсьтӥз Петр Михайлович, удмурт егитъёс пӧлы этнофутуризм мед вӧлмоз шуыса («Инвожо» журналэзлэсь кӧня ке номерзэ юромо та ужпумлы сӥзиз). Берло аръёсы со Удмурт ПЕН-клуб кылдытон бордын тырше. Туала вакытысь утчанъёсыз («Карас» бичет) лыдӟисьёсты трос ласянь шугъяськыто: ӧз ышты меда П. Захаров аслэсьтыз ымнырзэ, ӧз пӧрмыты-а лирикаез огшоры шудонлы-шузияськонлы?

Петр Захаров вордӥськиз 1961-тӥ аре 26-тӥ январе Татарстанысь Кукмор ёросысь Киня гуртын. Пияш песятаез борды тужгес но кыстӥськиз, соиз угось Библизэ лыдӟылыкуз но, радио пыр «Америкалэсь куаразэ» кылзиськыкуз но, кияз ручкаен пукылоз вал, пе. Нош атаез (кушемнимыз Гадӟи) сярысь ёросын пальыштыкъёс-анекдотъёс ветлӥзы, соос пӧлысь одӥгез проф. В. Кельмаковлэн «Образцы удмуртской речи» книгаяз но сюремын. «Куд-ог дыръя али ке но мон ас шорам ньыль аресъем синмыным учкисько,– шуэ Петр Михайлович. – Пинал дыръям эшъёсы монэ «Ӟичы» шуо вал, аспӧртэмлыко ироничной сямы понна, дыр. Нош бускель бигеръёс автошколаын дышетскон дыръя – Ар-Заки.

«Вордӥськонме но мон адямилэсь пӧртэм, дыр, вордӥськи, – шуэ Петр Михайлович, – мон йырыным, пе, ӧй поты, пыдыным, пе, потӥ. Соин но, дыр, армие монэ вань эшъёсылэсь люкыса Германие басьтӥзы (эшъёсме – Владивосток пала келязы). Нош Германиысен вань Татарстанысь пиослэсь висъяса, тӧдьы куакаез кадь – воксё мукет батальонэ нуизы. Армиын но мон адями сямен служить ӧй кары, армиысь но адями сямен ӧй берты – бертӥ гинэ но, арня улыса, Севере ужаны кошки, Харп посёлоке».

Но П. Захаров уйпалан кема ик уг улы, ӝоген отысь бертэ, кышнояське, Дэриысь (Завьяловоысь) райсельхозтехникае шофер луыса интыяське. Сизьым ар отын ужа, кык ар пала – «Ленинец» газетын, собере ини «Инвожо»-е вуэ.

УдГУ-ын дышетскон дыръяз, литература со понна огшоры зачет яке экзамен басьтон гинэ ӧй вал. Угось 30 аресъем студентлы ваньмыз со лыдӟиськонъёс бадӟым литературае выжыятскон но инъяськон сюрес вал ини (2010-тӥ аре потэм «Карас» бичетысь шуак адӟыны луылэ студент вакытысьтыз экспериментъёсты, кудъёссэ П. Захаров печатлатэк возе вылэм). Йылпумъясь диплом ужез «Обыда» нимо постмодернизмо пьеза вал, кудзэ «утьыны» солы драмтеатрысь Василий Ушаков режиссер юрттӥз.

Университет университетэн, но П. Захаровлы тужгес но бадӟым школа луиз Владимир Романовен пумиськон. Диплом ужезлэн азькылаз со гожтэ: «Сыӵе узыресь нуналъёс вал со, мынам улонам сомында метаморфозаос ортчизы. Та вакытэ мон весяклы куштӥ ни «баранкаме», тодматски Миша Федотовен, Слава Сергеевен; губка сямен мон кыскыны кутски литература улонысь самой ческыт, самой курыт, самой узыр сурсвузэ». Собере кӧня ке кыл дышетӥсез сярысь вера, аспӧртэмлыко Соос (бадӟым букваысен) тушмонлэсь пуштроссэ валэктыса: «Романовлэн веранъёсыз шайтанлэн ымысьтыз кадь потылӥзы. Со вера вал лек, но вера вал зэм. /…/ Володя серекъя вал Соосты, со жуге вал Соосты, пушнера вал, паре вал. Мон уг вераськы, «вож кый» со самой умоез висъяськон, улонэз умойгес адӟон амал шуыса. Но, мон сямен, соку со тужгес но кужмоез амал вал – «пощечина общественному вкусу». П. Захаров аслаз дышетӥсезлы трос гинэ чуръёссэ сӥзиз, соос пӧлын тужгес но висъяське «Мон кошкисько, ӧсме ворсатэк…» кылбур (кырӟан гожтӥз Надежда Уткина).

В.Романов улонысь кошкем бере, солэсь интызэ Михаил Федотов – Бесерман – басьтӥз. Соос ог-огенызы «Югдон» турбазаын семинар дыръя тодматско, Федотов кутскись авторлэсь кылбуръёссэ рос-прос эскере: «…малы «ошиськемын» соиз яке таиз чур, возьматэ, малы кылбур сумбрес пӧрмем», Ф. Васильевлэсь но В. Романовлэсь кылбуран техниказэс валэктэ. Мишалы тужгес но кельшизы «Кионъёс» но Шекспир сярысь кылбуръёс. Аслэсьтыззэ кионъёс сярысь ужзэ М. Федотов гожтэ ини, Петыр эшезлэсь дышетскыса (зэм, таизлэн «Чарлан» кылдэ). Нырысь гожтэм кылбуръёс пӧлын ик висъясько «Тополь», «Гудыри пи», «Мунчоям кортӵог шукки но…» но мукетъёсыз.

Петр Захаров – удмуртъёс пӧлысь нырысетӥез, кин этнофутуризм сярысь лад-лад вераськыны кутскиз. 1994-тӥ аре куартолэзе со Тартуэ калыккуспо конференцие ветлӥз. Отысь ӝуась синъёсын вуиз. Ӝоген «Инвожолэсь» одӥгзэ номерзэ (1994, № 9) быдэсак та ужпумлы сӥзиз. П. Захаровлэн валамезъя, этнофутуризм – со вашкала амалъёс пыр туала пуштросэз усьтон. Яке туала амалъёсын вашкала пуштросэз возьматон. Озьыен, асьмеос огдыре ик вашкала выжыосмес но утьыны тыршиськомы, туала постмодернизмо улонлэсь но палэнэ ум чальтчиське. Мукет сямен вераса, выль воштӥськись вакытэ асьмелэсь лулчеберетмес утёно гинэ ӧвӧл, сое азинтыны но луоно.

П. Захаров 1990-тӥ аръёслэн кутсконазы «Эбга» трагедиез бордын ужаз, сое Йӧскалык театрлэн сцена вылаз вуттӥз. Собере та синмаськымон ужез Финляндие финн-угор драматургилэн фестиваляз поттыны кариськизы. Трагедилэсь кужымзэ кунгожсьӧръёс вылӥ дунъязы, ӵапак сое этнофутуризм валатонэн герӟаса (со сярысь мон берлогес тодӥ, Хельсинкиын печатласькем «Синтез» (1994, № 8) тодослыко журналэн тодматскеме бере). Та журналын финн кылын печатламын кӧня ке статья, кудъёсаз Петр Захаровлэн «Эбга»-ез сярысь вераськон мынэ, нош ассэ удмурт драматургез но кылбурчиез ушъяса удмурт Лённрот нимало.

Кӧня ке ар ортчыса, этнофутуризм тулкым сярысь вераськон паськыт вӧлмиз, Удмуртиын трос калыккуспо фестивальёс ортчизы, журналлэсь эшшо кыксэ огазеям номеръёссэ П. Захаров (валтӥсь редактор чотын) та ужпумлы сӥзиз. Та вакытэ гожтэм кылбуръёссэ «Вож выж» (2001) книгаен поттӥз. Со вакытэ ик Петр Михайлович валаз, одӥг этнофутуризм эгес сьӧры гинэ ватскыны уг яра, маке но выльзэ утчаны кутсконо ини. Озьы «Вож выж» бичетын ик трос гинэ кылбуръёс пумисько, кудъёссэ утчанъёсты-экспериментъёсты сямен учконо луэ («Муньылон азьысь кызлэн уйвӧтэз»), уката ик графика ласянь радъям ужъёсты («Нырысетӥ учкон»), куарашудон амалъёсысь философиез поттӥсь кылбуръёсты («Шаер – со Шай»).

Книгаысь куд-ог чуръёс меӵак афоризме курисько, угось вакытлэсь аспӧртэмлыксэ но, кылбурчилэсь ироничной сямзэ но туж яркыт усьто:

     Йырдэ тупез кадь ӵыжыса,
     Астэ ачид серекъяса…
(90-тӥ б.)
     Синмы – кык телевизоръёс,
     Сизьым-тямыс программаысь гожъёс но титръёс…
(11-тӥ б.)
     Соин ик одӥг-ог дыре
     Инбам уг зор, музъем зоре…
(9-тӥ б.)

Удмурт кылбуретлы, шуэ П. Захаров, воргоронлыкогес луыны дыр вуиз ини, угось туала вакыт – со «ожчиослэн» вакытсы, нюръяськыны-ожмаськыны уд быгатӥськы ке (уката ик литератураын), аслад калыкедлы трос пайда лэсьтыны уд быгаты, удмурт инмаръёс азьын но возьыт потыны кулэ.

Петр Захаровлэн выль утчанъёсызлы дышыса гинэ вуиськод кадь – со ини мукет ӧре выже, эшшо но музон емышъёс дэмла. Татын нимысьтыз висъясько кылбурчилэн верлибръёсыз, пусъёс-знакъёс пуктылытэк гожтэм кылбуръёсыз («Карас», 2010). Угось П.М. Захаров, удмурт ПЕН-клуб сярысь сюлмаськыны кутскеменыз, ХХ даурысь Европа лирикаез удмурт кылэ берыктон борды басьтӥськиз, ӟуч литератураысь туала утчанъёсын лад-лад тодматскиз. Париже, Таллиннэ, Стокгольме, Риме вуылӥз. Отысен адӟиз, удмурт лирикаез азинтон удысын трос гинэ тырмымтэос, «тӧдьы виштыос» вань на, соос пӧлысь нырысетӥез – удмурт верлибрлэн ляб азинскемез. Но та муг – «палэнысь» гинэ, угось вань на «пушкысь» кылдэм муг, куке П. Захаров пуш куараеныз валаз, солэн аслаз азинскон сюрес вылаз вуиз вакыт: сюлэмлэсь куронзэ верлибр гинэ усьтыны быгатоз, нош кылбуре знакъёс тырид ке, малпан быдэсак куашкалоз но чеберлыксэ-кужымзэ ыштоз.

Ваньмыз таӵе утчанъёс – быдэсак литературамылэн курадӟонъёсыз, вормонъёсыз но висёнъёсыз; удмурт лыдӟисьёс, оло, авторен соглаш но уз луэ, но табере соосты лыдэ басьтытэк нокызьы уз луы.

(Дмитрий Иванов, Виктор Шибанов)