СлабовидящимСлабовидящим

Михаил Покчи-Петров

(4.10.1930 – 26.06.1959)

Михаил Покчи-Петров

Солэн яркыт гожъяськон кизилиез ӝуатскиз ХХ даурлэн шораз. Вордскиз Михаил Петрович 4-тӥ октябре 1930-тӥ арын Можга ёросысь Нышы-Какси гуртын. Нышы-Какси – удмурт гурт, соин ик кылбурчилы пичиысен пыӵатэмын, лэся, калыкез гажан, адямилыко луон, котыр улосэз утялтон но утён мылкыдъёс. Солэн музъем вылаз будӥзы трос дано, тодмо адямиос. Соос пӧлын вал Игнатий Гаврилов, Василий Гаврилов, тодмо артист но литературачи, драматургия удысын тодмо луись Анатолий Григорьев, кылбурчи Анатолий Петров. Али дыре но Нышы-Какси музъем будэтэ аслэсьтыз визьмо пушъетъёссэ.

Шор ёзо школазэ быдтыса, Михаил Покчи-Петров, вань егитъёс сямен ик, малпаськыны кутске азьлань улонэз сярысь, быръем ужез сярысь. Атаезлэн потэ вылэм, пиез кивалтӥсь мед луоз шуыса. Берло Михаил Петрович та сярысь кылбур но гожтоз. Нимаське со «Атаен вераськон». Нош пиез мукет сюрес бырйиз.

Трос тодмо писательёс сямен ик, пыриз дышетскыны Можга педучилищее. Татын ужа вал литературно-творческой кружок. Тросэз гожъяськисьёс шедьтӥзы быгатонлыксэс Можга педучилищеысь литературно-творческой кружоклы луыса. Озьы ик татын ужаз на драматической кружок, кудзэ вань сюлмысь басьтӥськыса, туж быгатыса, тунсыко нуылӥз Екатерина Алексеевна Коновалова. Та паймымон дышетӥсь аслэсьтыз кужымзэ, быгатонлыксэ трос тодмо адямиослы сётӥз.

Дышетскыны гуртысь кошкыса, студент луыса, адями нош но нош йыраз бергатыны кутске аслэсьтыз улонзэ. Озьы ик со мозме анай-атайлэсь, гуртлэсь, эшъёслэсь. Соку ик, дыр, вордскыны кутско туж ӟеч кылбуръёс – сюлэмлэн кырӟанъёсыз.

Гожъяськыны кутске Михаил Покчи-Петров Можга педучилищеын дышетскыкуз, ньыльдонэтӥ аръёслэн пумазы. 1949-тӥ арысен кылбуръёссэ элькун газетъёсын но журналъёсын поттыны кутско.

Можга педучилище бере Михаил Покчи-Петров тубе улонлэн эшшо одӥгез тубат вылэ – Удмурт пединститутлэн филологи факультетаз дышетскыны пыре. Одӥг арзэ дышетскыса, кошке Москвае. Москваысь Луначарский нимо театральной институтлэн режиссёрской факультетаз дышетске. Вить ар – 1951–1956 – тужгес но яркытэз Михаил Петровичлэн улоназ. Егит дыръяз Михаил Покчи-Петров туж яратӥз Москваез, солэн отын пӧртэм кунъёсысь трос эшъёсыз вал.

Кылбурчи, мае адӟе, ма гинэ бугыртэ солэсь сюлэмзэ, ваньмыз сярысь гожъя. М. П. Покчи-Петровлэн 1956-тӥ аре нырысетӥ кылбур сборникез потэ –«Тодматскон». Автор тодматэ ассэ лыдӟисьёсын, ачиз соосын тодматске, малпаське та сборниказ ас калыкез сярысь, эшъяськон, анай-атай, пинал дыр сярысь, йыраз кылдо улонлы сӥзем философской кылбуръёс. Егит пи табере зэмос воргорон синмын учке улон шоры. Капчи ӧй вал со улон, ноку но, дыр, уз но лу. Трос пол кылбурчи тодаз вайылэ агаезлэсь ожын быремзэ. Ненег малпанъёсын, чебер кылъёсын вордӥсько чуръёс мусо анаез сярысь. Со гожтэ та сборнике пырем «Анай» кылбураз:

     «…Тулыс куазь кадь бадӟым но сайкыт
     Тон сярысь малпанэ, веранэ.
     Ошмес ву кадь ик котьку чылкыт
     Тонэ вань улытозям гажанэ…»

Михаил Петровичлэн кылбуръёсаз шедьтомы кивалтэт сярысь но кылбуръёсты. Но меӵак та кылъёс верамын ӧвӧл – соос ватэмын. «…Кынмемын тон али, музъеме, / Мугордэ мур лымы шобыртэм. / Тон кезьыт. Нош кызьы-о сюлме / Та дыръя но лыктэ шунытэд?...». Кылбурчи данъян кылъёсын гожъяз Ленин, Сталин сярысь.

Кылбурчилэн кыкетӥ бичетэз нимаське «Малпаськон». Со потэ 1959-тӥ арын, «Тодматскон» бере куинь ар ортчыса. Зэм но, улон зол малпаськытэ Михаил Покчи-Петровез. Татчы пыро ин яратон сярысь кылбуръёсыз, улонын ог-огедлы юрттон тема озьы ик малпаськытэ авторез, котыр инкуазьлэн паймымон куараоссэ солэн кылбуръёсысьтыз шӧдӥськом. Тани, кылсярысь, «Тӧл» кылбураз со возьматэ чылкак улэп кадь, пель сьӧрын шӧдӥськись тӧллэсь шокамзэ.

     «…Каллен шонаськись льӧмпулэн ваеныз
     Чабъяз штораен шобыртэм укноез,
     Кылӥсь нош уз лу – вӧтало ни ваньмыз,
     Ӧз усьтэ кӧлӥсь кузёос ӧсъёссэс…
     …Нош тӧл лекомиз, вожомиз кадь соку!
     Зор ву шапыкез лек пазьгиз укное.
     Секыт мылкыдын азбарысь потыкуз,
     Ӟукыр вазьытӥз ӟирыё ӟезьыез.
     …Бӧрдӥз отын ӝож тэльмырись куараен,
     Юбо езъёсты крезь силы пӧрмытъяз.
     Кошкон азяз со муръёе лэзиськиз,
     Вузиз отын, ас улонзэ каргаса…»

Та сборниказ ик пыро вакчи поэмаосыз «Сӥзьыл» но «Эшен люкиськон». Кулэм бераз ини авторлэсь поттӥзы ӟуч кылын «Под небом твоим » ӟуч кылбуръёсын потэм сборниксэ.

Быгатӥсь адями пӧрмытэ ужаны вань удысъёсын. Михаил Покчи-Петровлэн трос ик кылбур сборникез потэмын ӧвӧл. Озьы ке но, ваньмыз соос, сюлэмысь потыса, калык пӧлы юн пыӵамын, кырӟанлы пӧрмемын. Кырӟан – со сюлэмлэн куараез. Озьыен, Михаил Покчи-Петров котькуд удмурт адямилэн сюлэмаз улэ.

Кылбурет удысын сяна, Михаил Покчи-Петров вакчи улонэз куспын тодмо драматург но луыны вуиз. Удмурт драмтеатрын солы кема ик ужаны ӧз кылды. Куинь сезон куспын режиссёр быгатыса пуктӥз трос спектакльёс удмурт, ӟуч но кунгожсьӧр драматургьёслэн пьесаоссыя но романъёссыя. Кылсярысь, Степан Широбоковлэн «Чукдор», Игнатий Гавриловлэн «Шунды ӝужаз» пьесаоссыя, Михаил Петровлэн «Вуж Мултан», Трофим Архиполэнв «Лудӟи шур дурын» романъёссыя, Островскийлэн «Пучина», Арбузовлэн «Шестеро любимых», «Таня» но Володарскийлэн «Фабричная девочка» пьесаосызъя.

Вакчи дыр куспын – солэн улонэз кузь ик ӧй вал – 1959-тӥ арын егит кылбурчи бырыны шеде. Михаил Покчи-Петров тубыны быгатӥз улонлэн туж вылӥ тубатъёсаз.

Солы сётэмын вал «Заслуженный деятель искусств УАССР» дано ним. 1958-тӥ арын луиз СССР-ысь писательёслэн огазеяськонзылэн ёзчиез. Кылбурчилэн кылбуръёсаз но кырӟанъёсаз шуккиськись куараез котьку сюлэмъёсамы улоз.

(Анна Бородина)